【波Boot實測】: Adidas X Speedportal.1 FG @hkfootballreview Herman

May 16, 2023

文章已得到作者同意轉發希望大家可以支持本地原創!

三間於上年度將X由Speedflow升級至Speedportal。貴為三間嘅速度型波Boot，X今次又會帶俾大家一個點既踢波體驗? 今次X Speedportal.1 FG 釘底用上Speedframe 2.0，當中就包括大家喜歡嘅碳纖用料，以及相當aggreessive箭咀型鞋釘，期望俾到大家更強嘅速度感。鞋面質料上，X Speedportal.1 用上Speedskin，佢會係一薄嘅織布質料嚟，再配以塗層。於鞋頭內側及外側位置上，就會有一粒粒凸起嘅紋理，期望可以增強觸球嘅球感。鞋踭位置上，X Speedportal.1用上新嘅科技Stability Wing，形狀似一對翼，外置於鞋踭位置，期望俾到大家更強嘅Lockdown。

阿靴就著X Speedportal.1 FG 於仿真草場上實測，感覺上足弓位置較緊，縱然波Boot係有鞋帶設計，較鬆咗之後仍然會有啲緊。至於鞋頭位置上，阿靴就認為佢有充裕嘅空間，踢波嘅感覺唔會太鬆又唔會太緊。

响咁多方面上，阿靴最滿意嘅係X Speedportal.1 FG 嘅速度感覺，箭嘴型釘設計令抓地力變得更強，碳纖鞋底亦令腳底回彈力更強。阿靴非常喜歡X Speedportal.1 FG 帶來嘅盤球感覺，波Boot輕巧而且鞋面較薄，大大提升到佢帶來嘅靈活感。今次阿靴於仿真草上實測，波boot抓地力會非常強，所以如果長時間於仿真草踢波嘅話，自己會選擇翻擁有短圓釘嘅AG波boot。此外，X Speedportal.1 FG 嘅Lockdown都算唔錯，Stability Wing設計可以令足踝固定於波Boot。

射門會係X Speedportal.1 FG 另外一個突出嘅地方，波Boot鞋面嘅織布Speedskin質感較薄，但係會帶少許硬度，而阿靴一直喜歡呢種鞋面質料，因為鞋面回彈力會較強，而且觸球時，腳面同波會相當貼近。另外，X Speedportal.1 FG唔需要點開鞋，就可以射到一啲較飄嘅波。阿靴會認為X Speedportal.1 會容易食得應個波，因此帶來嘅力量感相當理想。波Boot鞋頭內側及外側亦會有突起嘅紋理，佢哋可以增強射門球感，整體嚟講，X Speedportal.1 FG 腳內檔射門會係較急勁，畢竟紋理帶來嘅磨擦力唔算明顯。

X Speedportal.1 FG 帶來嘅控球質感屬於中上，於非真皮質料上算係非常理想，波Boot質料唔會太黏，亦唔會太跣，加上突起紋理，阿靴會覺得恰到好處。X Speedportal.1 FG 可以較輕鬆控下皮球，鞋面上面佢無用上特別嘅質料，所以觸感相當自然。不過當然，著開真皮嘅波友就未必會鍾意呢類型嘅球感。

X Speedportal.1 FG 長短傳上嘅發揮會係較弱，不過當然係佢其他嘅發揮都算出色。短傳上，X Speedportal.1 FG 質感屬於爽，較薄而且少硬嘅鞋面質料令傳球力量感變得較強，至於長傳上，波Boot需要時間調節，初期長傳發揮屬於一般，力量感充裕但係球感會稍為欠奉，不過隨時間去，長傳質感亦會提昇。阿靴會較喜歡X Speedportal.1 FG 嘅中距離腳內檔傳送，受惠於佢鞋頭內側嘅粒粒，球感亦會較好。

整體嚟講，X Speedportal.1 FG 係一對唔錯嘅速度型波Boot，大部分嘅發揮都屬於中上。唯獨舒適度會係X Speedportal.1 FG 最需要改善嘅位置，特別於足弓嘅襪套式鞋舌上，相信只要三間願意改鬆少少，波Boot評分錢更高。亦可能喱個原因，美斯所著嘅X Speedportal.1 同市面嘅會係唔同，於波Boot嘅襪套鞋舌上，美斯選用嘅X Speedportal.1 會係折疊式鞋舌，相信呢個設計亦會帶來更舒適嘅穿著感。

至於尺碼上，阿靴認為X Speedportal.1 FG 無偏大無偏細，大家只需要選擇正常尺碼就可以，至於鞋型上，阿靴認為佢係適合於中腳形嘅波友。

Adidas X Speedportal.1 FG 實測報告：

盤球：●●●●●
控球：●●●●
短傳：●●●◐
長傳：●●●◐
射門：●●●●●
舒適：●●◐
保護：●●●

產品連結: https://hkgballboot.co/products/x-speedportal-1-fg-2

Back to blog