【波Boot實測】: Mizuno Morelia Neo 3 Beta @hkfootballreview Herman

原文鏈結 作者 Instagram Profile 作者 Youtube 頻道

文章已得到作者同意轉發 希望大家可以支持本地原創!

【赤足體驗：Mizuno Morelia Neo 3 Beta 實測】

Morelia Neo，Mizuno旗下速度型袋鼠皮系列。今年度，Morelia Neo 2亦升級至第三代，而今次，阿靴就會同大家實測第三代嘅頂級版本：Morelia Neo 3 Beta，一對Made In Japan嘅Mizuno波Boot。Morelia Neo 3同第二代一樣，推出咗兩個頂級版本，分別係正常版本同Beta版本。Beta版嘅設計就用上Mizuno較新嘅科技，期望比大家一種更赤足嘅體驗。至於佢嘅發揮又係如何？今日，阿靴就同大家實測Morelia Neo 3 Beta。

Morelia Neo 3 Beta 拎上手時，响袋鼠皮波Boot嚟講屬於輕巧，鞋頭位置用上高質而且會較薄嘅袋鼠皮，不過佢鞋頭設計會較高，所以空間亦會較多。此外，為咗減輕重量，鞋後身位置就用上Mizuno嘅Barefoot Knit配以襪套式嘅鞋帶設計，期望比大家一個更貼腳嘅體驗。而於鞋踭位置上，Morelia Neo 3 Beta亦用上麖皮，鞋踭並會跟腳踭形狀凹入。鞋釘上，Morelia Neo 3 Beta一如既往用上傳統嘅12粒圓形釘，配以腳掌位置嘅特別設計釘粒。

阿靴就著過Morelia Neo 3 Beta作數場友賽，最令自己深刻嘅位置係Morelia Neo 3 Beta帶來嘅舒適度。Morelia Neo 3 Beta會俾到大家一種輕巧而且舒適嘅感覺，軟熟嘅袋鼠皮為舒適度加咗唔少分，加上袋鼠皮較薄，Knit用料配以襪套式設計，科技令波Boot相當包腳及貼腳，就如Mizuno嘅期望一樣，希望帶到俾大家赤足嘅感覺。

除此之外，Morelia Neo 3 Beta易帶來相當高質嘅盤球體驗，Morelia Neo 3 Beta鞋型較傳統Morelia修腳，正正符合到阿靴嘅腳形，配以較薄嘅袋鼠皮及Knit質料，Morelia Neo 3 Beta帶來嘅速度感同靈活感相當理想，呢一點响袋鼠皮波Boot嚟講相當少見。佢嘅Lockdown層面同樣出色，但又唔會帶來刮腳嘅狀況。此外，Morelia Neo 3 Beta鞋釘亦用上短圓釘，呢一點相當合適香港嘅草場，以及中至高質嘅仿真草場。

傳控球感同樣係阿靴感到滿意嘅地方，特別於長傳上嘅發揮會更為明顯，較薄嘅鞋面，配以優質嘅袋鼠皮，長傳嘅質感相當理想，波Boot帶來傳統嘅傳送球感，而較薄嘅鞋面亦帶來更貼腳嘅質感，可以較輕鬆就作出準繩嘅傳送，質感上會較柔，而力量感就屬於正常水平。於短傳上，因為鞋面較薄嘅關係，質感會較為爽而且去。控球上則屬於理想水平，不得不承認Morelia Neo 3 Beta帶來非常強嘅赤足感覺，控球上嘅感覺會非常明顯，不過阿靴就會較為喜歡皮革厚少少嘅控球質感。

射門上會係Morelia Neo 3 Beta較弱嘅位置，不過同樣地係因為佢其他位置都處於一個唔錯嘅水平。阿靴喜歡Morelia Neo 3 Beta嘅腳內檔射門，鞋頭袋鼠皮位置帶來理想嘅射門球感，加上鞋面較薄，腳內檔射門會較為急勁。至於腳面嘅射門上，發揮屬於理想，不過力量感唔算強，始終波Boot質感較為輕巧同薄。

Morelia Neo 3 Beta 嘅推出的確令人驚喜，阿靴會認為佢係一對相當具質素嘅袋鼠皮波Boot，由其喜歡傳統袋鼠皮球感，但又期望具速度感嘅波友，呢對波Boot正正可以滿足到呢類型嘅需要。不過，Morelia Neo 3 Beta亦會有唔好嘅地方，畢竟袋鼠皮會較薄，因此保護層面亦會較弱。

至於尺碼上，因為袋鼠皮薄，以及鞋頭較高嘅關係，阿靴會建議選擇細半碼，至於鞋型上，Morelia Neo 3 Beta屬於中腳型，不過袋鼠皮關係，波Boot會隨時間同腳融入，阿靴認為中至闊腳嘅波友亦會合適。

Mizuno Morelia Neo 3 Beta 實測報告：
盤球：●●●●◐
控球：●●●●
短傳：●●●●
長傳：●●●●◐
射門：●●●●
舒適：●●●●◐
保護：●●●◐

產品鏈結: https://hkgballboot.co/search?q=morelia%20neo%20iii
--------------------------------------------------
【屎波裝備多Instagram】Follow: instagram.com/hkfootballreview
【波Boot實測】Adidas Top Sala Lux: https://youtu.be/R7Win_I5PQw
【波Boot實測】白飯魚: https://youtu.be/-dbvs0_YgiY
【波Boot比較】五對驚喜釘Boot: https://youtu.be/vzDRe25kkrM