【波Boot實測】: Nike Tiempo Legend 9 Elite AG @hkfootballreview Herman

May 16, 2023

文章已得到作者同意轉發希望大家可以支持本地原創!

Tiempo上年度由第八代升級至第九代，配色上亦出咗唔少靚嘅選擇。Tiempo作為Nike旗下嘅袋鼠皮波Boot系列，一直嘗試保留住Tiempo傳統設計，同時加上科技嘅配搭，打造成一對頂級嘅真皮波Boot。Tiempo再次升級，阿靴當然要同大家實測吓呢對波Boot嘅性能，再次感謝 @hkgballboot 嘅波Boot提供，令阿靴响外國仍然能夠實測唔同嘅波Boot。今次實測嘅波Boot，會係Tiempo 9嘅頂級Elite版本，而用上嘅鞋釘就係仿真草AG釘。

Nike就講到Tiempo Legend 9 Elite係眾Tiempo裡面其中最輕嘅一對。Tiempo Legend 9 Elite用上袋鼠皮，佢用上無車線嘅科技，將袋鼠皮配置於波Boot上。波Boot鞋頭兩側，以及鞋內側位置亦用上Foam質料，佢微微突起，亦有細點嘅紋理，期望可以增強波Boot嘅球感。鞋舌位置上，Tiempo Legend 9 Elite用上網狀質料，期望帶備大家舒適又透氣嘅感覺。鞋墊上亦帶有緩震用料，希望俾到大家一個更舒適嘅體驗。至於鞋釘，因為佢係AG版本，佢用上短身而且較密嘅細圓釘。

阿靴就著過Tiempo Legend 9 Elite踢過數場嘅比賽，最滿意嘅係Tiempo Legend 9 Elite嘅球感，畢竟Tiempo係Nike旗下主打袋鼠皮傳統球感嘅波Boot。阿靴認為Tiempo Legend 9 Elite嘅控球球感屬於高質，無縫袋鼠皮質料提供到優質控球球感，而鞋頭位置及鞋內側嘅點點紋理，將球感發揮得更好，特別於一啲中長距離嘅傳送，Tiempo Legend 9 Elite可以更輕鬆地將皮球控下，而突起嘅Foam質料亦帶來少量卸力。

阿靴亦非常滿意Tiempo Legend 9 Elite嘅長短傳發揮。腳內檔短傳上，袋鼠皮加上Foam用料及點點紋理，帶嚟更穩定嘅傳送路線。

至於長傳上，Tiempo Legend 9 Elite發揮更為明顯，較修腳嘅鞋型亦令呢對袋鼠皮波Boot變得更食力，而且球感突出，可以較輕鬆將皮球斬往期望嘅地方；此外，Tiempo Legend 9 Elite亦容易做出一啲較柔嘅長傳。

至於射門層面上，Tiempo Legend 9 Elite需要時間開鞋，射門嘅感覺初時會相對Flyknit質料波Boot會較為遜色，畢竟袋鼠皮需要時間同腳掌慢慢融入。不過隨時間去，射門嘅質素會越嚟越好。阿靴會幾喜歡用Tiempo Legend 9 Elite作腳內檔嘅燙射，始終袋鼠皮加上Boot內側嘅特別配置帶來高質嘅球感；此外，Tiempo Legend 9 Elite鞋內側帶來啱啱好嘅摩擦力，射門弧度明顯而不缺力量。至於腳面射門上，力量感屬於中上，隨時間去，亦可以做到一啲食得應嘅腳面射門。

盤扭層面上，阿靴認為Tiempo Legend 9 Elite俾到一種相當舒適嘅感覺俾大家，而AG釘底亦帶來適中嘅靈活度同抓地力，令大家於仿真草上可以舒適地盤帶。AG釘屬於短圓釘，阿靴認為佢相對Tiempo Legend 9 Elite 嘅FG釘更合適於仿真草上作賽，畢竟FG釘會較長而且呈唔同形狀，而AG短圓釘就會啱啱好，亦可以減低大家受傷嘅機會。阿靴認為Tiempo Legend 9 Elite於袋鼠皮界別嚟講算輕巧，不過速度感就一定會較Mercurial同X等波Boot遜色。

鞋型上，阿靴認為Tiempo Legend 9 Elite鞋型較修腳，不過因為佢係袋鼠皮關係，佢會隨時間與腳掌融入，阿靴認為佢合適絕大部份嘅波友，除非你係闊腳或者超闊腳。尺碼上，阿靴認為Tiempo Legend 9 Elite無偏大或者偏細，大家選擇正常尺碼就可以。

Nike Tiempo Legend 9 Elite AG 實測報告：
.
盤球：●●●◐
控球：●●●●●
短傳：●●●●◐
長傳：●●●●◐
射門：●●●●
舒適：●●●●◐
保護：●●●●

產品連結: https://hkgballboot.co/products/legend-9-elite-ag

Back to blog