【波Boot實測】: Adidas Predator Edge.1 Low FG @hkfootballreview Herman

原文鏈結 作者 Instagram Profile 作者 Youtube 頻道

文章已得到作者同意轉發 希望大家可以支持本地原創!

Predator今年年頭就由Freak升級至Edge。Predator貴為三間嘅傳統系列，自從新推出後，除咗無鞋帶設計，以及更Agressive嘅外表外，感覺比較舊時嘅Predator略為遜色。Predator18同19嘅黏貼質料，去到Predator Mutator同Freak嘅粒粒鞋面，可以見到三間一直希望於科技上有所突破。佢哋期望可以有創新嘅設計，亦希望Predator間強勁「拉西」球感傳承落去。今次，阿靴就會同大家實測Predator Edge.1 Low，佢係一對低筒有鞋帶嘅選擇嚟。

 

Predator Edge.1 Low同近代Predator一樣，用上Primeknit質料，最特別嘅係佢鞋面所用上嘅紋理。佢由上代突出嘅粒粒設計，轉為橫紋Control Zone拉西膠設計，膠條微微突出，摸落感覺會幾啜吓，亦令人想起舊時嘅Predator Lethal Zone。Predator Edge.1 Low同樣用上襪套式設計，目標令腳更貼合波Boot。至於鞋釘上，阿靴實測嘅款式係FG，而佢嘅鞋釘配置為兩件式，三間亦話到，鞋頭位置最頂嘅一粒釘會係重少少，期望帶俾到大家踢球時更具力量感。

阿靴與Predator Edge.1 Low進行實測，最滿意嘅係Predator Edge.1 Low嘅控球感覺同埋拉西膠帶嚟嘅力量感。先講控球，阿靴認為新嘅橫紋Control Zone帶來到一種痴波落嚟嘅感覺，特別响一啲高波嘅控球上，阿靴會認為可以較輕鬆將個波控落自己期望嘅位置，同樣地，於地波嘅控球上面，Predator Edge.1 Low嘅球感都相當唔錯，可以將皮球較輕鬆咁控下，佢於高波嘅控球上會更明顯。至於射門上，阿靴認為Boot上嘅膠質橫紋帶嚟咗更強嘅回彈力，因此射門相當具力量感，於開鞋後，射門亦會較急勁。長傳上，Predator Edge.1 Low力量感會相比以往大，因此需要修正，才可以將波斬去自己期望嘅位置，不過受惠於拉西膠，佢帶來嘅球感相當出色；至於短傳上，球感覺相當實淨。

不過，Predator Edge.1 Low亦有唔好嘅位置。Predator Edge.1 Low嘅因為鞋面嘅膠條令到鞋身較硬而且重，亦影響到佢穿著嘅舒適度，整體感覺會較笨重，而且靈活度會較弱。

至於射門上，阿靴會覺得佢係需要較長時間開鞋及適應，一開始會係有啲唔太習慣，不過開鞋後力量感相當強，鞋上嘅拉西膠亦帶來更強摩擦力，射門弧度亦會較明顯。

至於鞋釘上，阿靴實測嘅係FG真草釘，鞋釘呈三角形亦較長，踢落感覺會較Agressive，抓地力亦相當強，不過阿靴就較喜歡短少少嘅釘。此外，於Predator鞋頭特別配置嘅釘，縱然三間話佢係重少少加強力量感，阿靴就認為個科技只係Gimmick，帶來嘅分別唔算大。

整體黎講，阿靴覺得現時嘅Predator同舊時嘅Predator仲有個距離。有時會諗返，舊時嘅真皮配以範圍較細嘅拉西膠，帶嚟嘅表現可以話係難以取代。於新Predator嘅設計中，Primeknit配以拉西膠會係未來大方向，不過太多太密嘅拉西膠，就會令波Boot變得笨重而且唔靈活。Predator Edge.1 系列上同樣設置高襪筒同無襪筒嘅選擇，而阿靴會較喜歡後者， 因為帶嚟嘅靈活度亦會較高。

最後，阿靴覺得Predator Edge.1 Low 有少少偏長嘅狀況，所以會建議大家選擇細半碼，至於鞋型上，阿靴認為佢會適合闊腳嘅波友。

Predator Edge.1 Low FG 實測報告：
.
盤球：●●●
控球：●●●●◐
短傳：●●●●
長傳：●●●●◐
射門：●●●●
舒適：●●●
保護：●●●●◐