【波Boot實測】: Nike Tiempo 9 Pro TF @hkfootballreview Herman

原文鏈結 作者 Instagram Profile 作者 Youtube 頻道

文章已得到作者同意轉發 希望大家可以支持本地原創!

之前阿靴就同大家實測過Tiempo 9 Elite嘅AG版本，今次阿靴再次Review Tiempo 9，不過會係佢哋Pro版碎釘選擇，佢屬於碎釘嘅頂級版本嚟。Tiempo 9 Pro TF用料上會同平底Pro版本接近，所以有考慮過平底版本嘅波友都可以參考吓呢個Review。

 

Tiempo 9 Pro TF鞋面用上柔軟皮革，配以佢今代所用嘅Foam質料。Foam質料上面會有一點點突起嘅紋理，放於鞋頭兩邊位置，以及於腳內側位置。Foam質感柔軟，加上點點紋理，期望可以增強用家嘅控球球感。鞋舌上則會用上網製質料，期望俾到大家一種貼腳又透氣嘅感覺，鞋踭位置微微凹入，佢用上膠質質料，期望俾到一個更好嘅Lockdown俾大家。至於緩震上，Tiempo 9 Pro TF用上Nike波Boot常見嘅React避震質料。

阿靴就著過Tiempo 9 Pro TF進行多次友賽了解佢嘅性能，阿靴最滿意嘅會係佢嘅控球感覺， 雖然Tiempo 9 Pro TF唔係用上袋鼠皮，但係佢嘅皮革配以Foam科技，無論於短或長距離嘅傳球上，都可以較輕鬆咁將皮球控下。阿靴認為Foam會有少量卸力作用，而且可以令控球嘅面積變得更大，再加上Foam上面突起嘅點點，控球質感可以話相當理想，但當然，佢同Elite版本嘅袋鼠皮質料會有一個距離。

阿靴亦滿意Tiempo 9 Pro TF嘅傳球感覺，同樣受惠於皮革及鞋面嘅科技，傳球感覺相當穩定，尤其於腳內檔嘅短傳上。至於長傳上，阿靴認為佢需要多啲時間開鞋，一開始長傳感覺會較為生硬，不過隨時間去，皮革會同腳掌融入，而且變得較柔軟，因此長傳球感都會變得越來越好，而且具備力量感。

射門上面，阿靴認為Tiempo 9 Pro TF屬於中上水平，阿靴會較為喜歡佢嘅腳內檔嘅熨射，皮革用料加上Foam鞋面科技令到射門球感更好， 射門弧度亦較為明顯。腳面射門上，阿靴會認為發揮一般，畢竟Tiempo 9 Pro TF唔係咁容易射到較漂嘅波。

舒適度亦會係Tiempo 9 Pro TF 嘅優勢，佢較闊嘅鞋型，以及React緩震科技，令踢波嘅舒適感大大增加。碎釘嘅抓地力於地氈地及較薄嘅人造草上都算充裕，不過响較厚以及新嘅仿真草場上，阿靴就會建議大家用翻仿真草釘。

可惜嘅係，耐用度會係Tiempo 9 Pro TF遇到嘅問題，之前阿靴就上網睇過吓其他人嘅評價，唔少人就講到佢鞋頭位置好容易同鞋底分開。不過，阿靴so far就未遇到呢個狀況，可能阿靴著佢唔算密，但係Tiempo 9 Pro TF嘅鞋頭位置容易攝入仿草膠粒。

Size上，阿靴認為佢無偏大無偏細，大家選擇返正常尺碼就可以。至於鞋型上，阿靴認為佢會合適中至闊腳嘅波友。

Nike Tiempo 9 Pro TF實測報告：(評分會與平底波Boot作比較)
盤球：●●●
控球：●●●●◐
短傳：●●●●
長傳：●●●●
射門：●●●
靈活：●●●
避震：●●●●●

產品連結: https://hkgballboot.co/products/preorder-nike-react-legend-9-pro-tf